1000 متابع لصفحتنا على الفايسبوك

امس في الايام جمعية فن كانت 'مجرد' فكرة خمّموا فاها 3 مالناس .. اما لي نؤمنو بيه كونو باش تحلم وحدك يبقى مجرد حلم .. اما كي نبدو مع بعضنا و نتشاركو الحلمة وقتها وين يبدا يتحقق الحلم .. و من غادي بدت الحكاية ..
صحيح في البلاد اذي ما فما شي يشجعك على ممارسة العمل الثقافي و الفني آما زادا الاستسلام و الرضوخ للرداءة و التصحر ما هوش الحل .. على هذاكا حطيناها تحدي كونو كشباب مدينة المكناسي ما لازمناش نكونو سلبيين لازمنا نتعاطو مع الوضع بشوية ايجابية و كل انسان من بلاصتو يساهم في تغيير الوضع .. تغيير العقلية .. اول ما بدينا لقيناه مناخ "صحراوي قاحل" لي تسئلو تقلّو الثقافة و الفن وين يقلّك و هو يضحك ما عناّش بكسر العين "ما عِنَّاشْ" .. و مالطرائف لي حصلتلنا كونو على خاطر خرجنا نلمو في تبرعات باش نخدمو باهم رسومات عالحيط تلقى روحك قدّام رئيس المركز لي يقلك راو لي تعمل فيه ممنوع و اسمو في القانون "مساسية" .. اما طبعا لازمك تتعدا و تحسب روحك مش هنا على خاطر عارفين كونو الصعوبات و التحديات اذي باش نواجهوها .. لي يضحك عليك و لي يقلك ما عندكم وين توصلو .. اما عالعادة الوذن لازمها تكون مسكرة .. نجحنا في حاجات و فشلنا في اخرى اما مهما يكون عملنا خطوة لا يستهان بها .. يعني ما لازمناش نستسلمو و لازمنا نواصلو الكفاح .. اي نعم "كفاح" خاطر الثنية مزالت طويلة و الخطوة لي مشيناها رغم اهميتها تعتبر صغيرة يعني لازمنا نكملو مسيرتنا "الثقافية" في انتظار انضمام بقية الشباب .. شباب المكناسي .. و في الاطار اذا نحبو نشكرو كل من دعمنا ماديا و معنويا حتى بالكلمة الطيبة .. و نشكرو كل انسان بعثلنا مساج على الصفحة شجعنا فيه و عبر على اهتمامو بالفكرة .. كلماتكم هي لي تعزز فينا الارادة باش نواصلو .. شكرا اصدقائي ..